ബെംഗളുരു: ഉപമുഖ്യമന്ത്രി ഡി കെ ശിവകുമാറിനെ ചർച്ചകൾക്കായി ശനിയാഴ്ച പ്രാതലിന് ക്ഷണിച്ചതായി കർണാടക മുഖ്യമന്ത്രി സിദ്ധരാമയ്യ. കഴിഞ്ഞ ദിവസമാണ് മാധ്യമങ്ങളെ അദ്ദേഹം ഇക്കാര്യം അറിയിച്ചത്. എല്ലാം ഞങ്ങൾ ചർച്ച ചെയ്‌തോളാം എന്നാണ് സിദ്ധരാമയ്യ പറഞ്ഞത്. സംസ്ഥാന നേതൃത്വവുമായി ബന്ധപ്പെട്ട പ്രശ്‌നങ്ങൾ പരിഹരിക്കാൻ രണ്ടു നേതാക്കളും ചർച്ച നടത്തണമെന്ന് ഹെെക്കമാൻഡ് ആവശ്യപ്പെട്ടിരുന്നു.
'ഹൈക്കമാൻഡ് ഡി കെ ശിവകുമാറിനെ വിളിച്ചിരുന്നു. അവർ എന്നെയും ബന്ധപ്പെട്ടിരുന്നു. ഇരുവരോടും നേരിട്ട് സംസാരിക്കാനാണ് പറഞ്ഞത്. അതിനാലാണ് ഞാൻ അദ്ദേഹത്തെ പ്രാതലിന് ക്ഷണിച്ചിരിക്കുന്നത്. ഞങ്ങൾ എല്ലാ കാര്യങ്ങളും ചർച്ച ചെയ്യും'- സിദ്ധരാമയ്യ പറഞ്ഞു.
ഇരുനേതാക്കളും തമ്മിലുള്ള വാക്ക്‌പോര് രൂക്ഷമാവുകയും 2023ലെ തെരഞ്ഞെടുപ്പ് വിജയത്തിന് ശേഷം കോൺഗ്രസ് നേതൃത്വം നടത്തിയ രഹസ്യകരാറിനെ കുറിച്ച് ഡികെയും തുറന്നടിക്കുകയും ചെയ്തിരുന്നു. ഭരണം കിട്ടി രണ്ടര വർഷം തികയുമ്പോൾ സിദ്ധരാമയ്യ മുഖ്യമന്ത്രി പദം ഒഴിയണം എന്നതായിരുന്നു തീരുമാനം. നവംബർ 20ന് സിദ്ധരാമയ്യ അധികാരമേറ്റിട്ട് രണ്ടര വർഷം കഴിഞ്ഞു. പിന്നാലെ ശിവകുമാറിന്റെ അനുയായികൾ അടക്കം മുഖ്യമന്ത്രി വാഗ്ദാനം പാലിക്കണമെന്ന് ആവശ്യപ്പെട്ടിരുന്നു.
ഇതിന് പിന്നാലെ കർണാടകയിലെ ജനവിധി അഞ്ച് വർഷവും ഉത്തരവാദിത്തത്തോടെ പൂർത്തീകരിക്കണമെന്നതാണെന്ന് സിദ്ധരാമയ്യ എക്‌സിൽ കുറിച്ചിരുന്നു. എന്നാൽ വെള്ളിയാഴ്ച ഹൈക്കമാൻഡ് തീരുമാനം അംഗീകരിക്കുമെന്നാണ് പ്രസ്താവന നടത്തിയിരിക്കുന്നത്.
Content Highlights: Siddaramaiah calls on D K Shivakumar for Breakfast today